HIS OBSESSIONS: The Basketball Superstar

kusepong Romance

Hinahanap niya ang lalaking sumira sa buhay niya. Bakit sa pangunahing suspek niya gustong magpakatotoo?
Isang pribadong mensahe. Isang pangakong walang ibang makaaalam. Isang video na hindi dapat nakita ng mundo.
Sa isang upload, gumuho ang buhay ni Nico Mamaril-Lo. Dati, pangalan niya ang isinisigaw sa bawat panalong puntos. Ngayon, bawat kamera at notification ay nagpapaalala na may mga taong pinagpiyestahan ang pribadong bahagi ng buhay niya.
May pangalan ang itinuturong responsable: Dr. Adam Catacutan.
Sikat na psychiatrist. Hinahangaang influencer. Napakagandang reputasyon—hanggang lumitaw ang isang nakamaskarang lalaking may pamilyar na boses at markang katulad ng nasa kaniyang katawan.
Para malaman ang katotohanan, kusang pumasok si Nico sa Catacutan Center. Lalapitan niya si Adam, kukunin ang tiwala nito, at hahanapin ang pagkakamaling maglalantad dito.
Hindi niya inasahang magiging mahalaga kung paano siya tinitingnan ng lalaking dapat niyang bantayan.
O na isang gabing malayo sa Center, siya mismo ang pipiling manatili.
“Gusto mo bang umalis ako?” tanong ni Adam.
Sa halip na sumagot agad, hinawakan ni Nico ang kamay nito. “Gusto kong alam mong puwede akong magbago ng isip.”
“Kahit kailan.”
Saka lamang siya lumapit. Dumampi ang halik niya sa labi ni Adam, maikli at nag-aalangan, bago siya huminto upang salubungin ang tingin nito. Nang muling magtagpo ang kanilang mga labi, wala nang tanong kung kapwa nila iyon pinili. Hinaplos ni Adam ang pisngi niya; isinandal naman ni Nico ang noo sa balikat nito, hinahayaang may makalapit nang hindi kailangang ipagtanggol ang sarili.
“Dito ka muna,” bulong niya.
At nang gabing iyon, nanatili si Adam.
Ang sumunod ay sa kanilang dalawa lamang.
Ngunit pagsapit ng umaga, may panibagong video.
May mga oras na hindi nagtutugma. May mga taong tila alam ang susunod na mangyayari. At may isang lumang gabing ayaw pag-usapan ni Adam—isang gabing maaaring mag-ugnay sa makapangyarihang mga ama at sa mga anak nilang nagiging biktima.
May nagmamasid sa kanilang dalawa.
May gustong patahimikin si Adam.
At ngayon, may magagamit nang bagong kahinaan laban kay Nico.
Dumating siya para ilantad ang lalaking pinaghihinalaan niya. Paano kung ang pag-ibig dito ang maglantad sa kanilang dalawa sa tunay na salarin?

Unfold