Lapis,Bala at KORONA(S.F. Traya)

yaya Action

Sinopsis: Lapis, Bala, at Korona
Sa bayan ng San Roque, ang kapangyarihan ay pinag-aagawan sa tatlong paraan: sa talim ng pahayag, sa dahas ng sandata, at sa bigat ng posisyon.
Si Gobernador Diego ang nagpapatakbo sa bayan gamit ang kanyang bakal na kamay at ang kapangyarihan ng korona. Ngunit ang kanyang pamumuno ay patuloy na niyanig ng mga artikulo ni Mariposa, isang matapang at ideyalistang mamamahayag. Gamit ang kanyang lapis, ibinubunyag ni Mariposa ang mga katiwalian sa pamahalaan, dahilan upang maging mortal silang magkaaway ng gobernador. Ngunit sa likod ng kanilang pampublikong bangayan, may namumuong bawal at mapanganib na atraksyon na susubok sa kanilang mga prinsipyo at tungkulin.
Habang abala ang dalawa sa kanilang tapatang-salubong, isang mas madilim na banta ang gumagalaw sa anino. Ang sakim na negosyanteng si Alejandro at ang malupit na si Andres ay nagpakana upang pabagsakin si Diego at tuluyang patahimikin si Mariposa upang sila ang maghari sa San Roque. Kasama sa kanilang masamang balak ang mapanuring si Merly, isang kaakit-akit ngunit mapanganib na babae na ginagamit ang kanyang ganda upang manipulahin ang mga nasa kapangyarihan.
Ang unang galamay na mahuhulog sa bitag ni Merly ay si Rodante, isang tapat na tauhan na may malinis na reputasyon. Ang lumalalim na pagkaakit at bulag na pag-ibig ni Rodante kay Merly ay unti-unting wawasak sa kanyang katapatan, at magiging mitsa ng pagka-gulo ng mga plano ng magkabilang panig.
Sa mundong ang hustisya ay binabayaran ng bala at ang katotohanan ay pilit ibinabaon, kakailanganin nina Diego at Mariposa na mamili: Ipaglalaban ba nila ang kanilang mga sinumpaang tungkulin, o magpapadala sila sa silakbo ng damdamin habang ang bayan ay unti-unting nasusunog sa kasakiman ng iba?
PROLOGO:
Sa pagitan ng talim ng mga salita at ng nakakabinging putok ng baril, may isang trono na pilit inaabot ng maruruming kamay. Sa bayang ito, ang kapangyarihan ay hindi lamang sinusulat gamit ang tinta—ito ay binabayaran ng dugo, at madalas, pinapalamutian ng ginto.
Si Gobernador Diego ang sagisag ng korona. Sa kanyang mga balikat nakapatong ang bigat ng isang madilim na pamumuno, isang lalaking binuo ng batas at ng mga lihim na tanging ang apat na sulok ng kanyang opisina ang nakakaalam. Ngunit sa likod ng kanyang seryosong mukha at bakal na kamay, may isang kahinaan na unti-unting bumabasag sa kanyang panangga: si Mariposa.
Si Mariposa, ang babaeng may hawak ng lapis. Siya ang tinig ng mga walang boses, ang mamamahayag na ang bawat artikulo ay mistulang bala na tumatama sa puso ng mga tiwali. Siya ang pinakamatalas na kritiko ni Diego, ngunit siya rin ang natatanging liwanag na nagpapakita sa gobernador ng natitira nitong pagkatao. Sa isang mundong magkaaway ang batas at ang katotohanan, ang kanilang mga mundo ay nakatadhanang mag-umpugan—at magtagpo.
Ngunit ang korona ay laging may kaaway, at ang ginto ay laging may sakim na nag-aabang.
Sa kadiliman, gumagalaw ang mga anino nina Alejandro at Andres. Si Alejandro, ang tusong negosyante na handang sunugin ang buong bayan para sa sariling interes, at si Andres, ang malupit na galamay na walang pakiramdam kung pumatay. Sila ang nagmamanipula sa likod ng tabing, naghihintay ng tamang pagkakataon upang pabagsakin si Diego at patahimikin si Mariposa nang tuluyan.
Kasama nila ang mapanganib na si Merly. Si Merly ay parang rosas na gawa sa bubog—maganda ngunit nakakasugat, kaakit-akit ngunit nakamamatay. Siya ang ginagamit nina Alejandro upang lasunin ang isipan ng mga makapangyarihang lalaki.
At sa larong ito ng ahas, walang mas malaking biktima kundi si Rodante. Isang tapat na tauhan na may malinis na prinsipyo, si Rodante ay unti-unting nahuhulog sa bitag ng kamandag ni Merly. Ang kanyang pagkaakit sa babae ay tila isang sumpa—isang matinding bulag na pag-ibig na unti-unting umaagaw sa kanyang katapatan, at maaaring maging mitsa ng kanyang sariling kapahamakan.
Nakahanda na ang entablado. Ang lapis ay May tulis, ang bala ay nasa loob na ng ikasa, at ang korona ay naghihintay sa kung sino ang matitirang nakatayo. Sa digmaang ito, sino ang mananaig: ang katotohanan ba ng mamamahayag, ang kapangyarihan ng gobernador, o ang kasamaan ng mga nasa anino?

Unfold